她和他的感動
（一）
故事的結局，男女主角仍無法如願。的確，若要營造大時代的悲哀，男主角的死，是必要的。這是英雄主義。電影中被稱為男人的，必須是英雄。不是英雄的男人，不值得世人銘記。
鏡頭一轉，災難經已結束。穿著一身深黑色的哀服，女主角手持鮮花，默立於男主角之墓前。她知道，她比別的女人幸福，也比她們幸運。無言凝望墓碑，追憶舊事。雖然最愛的，早已不在人世，但畢竟亦曾經轟烈。愛的男人是英雄，雖死，他，卻比任何活著的男人更偉大，更巨大。而愛情，已經超越生死。
蔚藍的晴空之下，這個動人的愛情故事隨著配樂的結束而告終。雖然沒有白鴿的襯托，卻比浪漫更加浪漫。抹掉眼前淚光，我說我會比她堅強。
影院的照明早已亮起，我心卻仍在悸動。但願我可，活在動盪世代，締造我的名字和我的愛。
踄步於幻想之中，我忽然被一團溫暖所緊擁。
「走吧。」他對我說。
（二）
坐在一家以白色為主調的西餐廳，簡約的設計在藍調的情歌氛圍之下，感覺格外浪漫。唯一和環境不協調的，是他。我眼前的他。
束一頭短髮的他，戴著一副隨處可見，普通得不能再普通的黑框眼鏡。穿著白色的短tee，雖然簡單，但衫上印著的圖案卻令我十分反感。
「食咩？」他傻笑地，等待著我的答覆。
看到他那討厭的笑容，我無名火起。餐廳是我選的，戲院也是我選的，難度他一點選擇的能力也沒有？難度食物也要我求選擇？
「你鐘意啦。」我看著餐牌，刻意回避他的眼神。
「有無D平D架呢？！」
價錢。還是價錢。和我吃一頓簡單的晚餐，價錢竟然比情調更重要。看著他，我不禁搖了搖頭。
「平，不如剩食甜品啦。」
「GOOD IDEA! 咁我地叫一個Set Din，入面個甜味留比你食咪得囉。」
我冷眼而視，他竟然可以完全無視。作為他的女朋友，我感到十分羞恥。
「你食埋個甜味啦，我唔肚餓。」潛台詞是，看著你，我沒有胃口。
「咁…好啦。我食埋啦。陣間如果你肚餓，我去買個8蚊雙牛比你食啦。」
我只能冷笑一下。拿出Iphone上facebook，在status留下了一句"我只想被感動"，作為我的無聲抗議。
看著他，我反覆自問，我是否做錯了甚麼？如他的一個人，無論在性格上，還是外貌上，也是我討厭的一類。但偏偏，這個人就是我的男朋友。我沒有要求他，擁有明星般的俊朗，亦非渴望他有高尚的品味和內涵。我要的，只是一個可以被稱為"男人"的男人。但這個人，不是他。
環境仍然是那般浪漫，而他仍舊是同一個樣子。期待著他談論電影，但他只知道吳宇森和白鴿。說到音樂，他只記得Wonder Girl。更莫論文學話題了。整夜話題，十之八九圍繞著高登。"So sad"，"向左走向右走"，他說起來手舞足蹈，我卻聽得只想"Hi Auntie"。
（三）
拒絕了他送我回家的慣例，這夜，我想一個人靜靜的，好好想清楚。
坐在廣場上的長椅，我享受一個人的寧靜。廣場上的街燈和以往略有不同。昔日淡黃色溫，如今換成了白燈冷溫。儘然畫面構圖少了一份浪漫情懷，但冷溫卻又為廣場增添了一分寂靜意境。
我在facebook寫下的那一個status，三小時以來，得到了18個like，和11個comment.
以Iphone為廣場的肅寂拍下一張圖片，配以一句「一個人也很快樂」，又上傳到facebook去了。
的確，我害怕只有自己一個人。我強調一個人，只為了希望別人留意到我只有一個人。我希望他們，讚同我一個人時的堅強，和表面上，對一個人的嚮往。表明一個人，只因我恐懼只有自己一個人。
看著冷冰冰的廣場，我感到無比孤獨。我越想正視，卻緊張得無法正視。看著眼前這般空洞，我看到內心世界。感覺凌亂，我渴望擁抱時的溫暖。
奔跑在恐懼之中，我被一團溫暖所緊擁。
「沒事吧？」一把溫柔的男聲在我耳邊輕聲道出。
（四）
沒有做錯，我知道。愛情無分對錯。
側臥於床上，棉被以下是我赤裸的身軀。昨夜纏綿，道德上雖然並不容許，但在愛情角度，誰也沒有錯。
情到濃前，我們把酒當歌。星空之下，我們無所不談：由俄國文學，到電影深度；由古典音樂，到人類前途。以後，我們相擁，我們纏綿，我們承諾不變。
電話顯示我有未接來電。他，33次。夠了。完了。我和他，完了。
我綣戀著這雙人床，或者，是留戀它的餘溫。我不願離去，不願讓溫暖，消散在世界中的混亂。
（五）
仍然是冰冷冷的廣場，我感到孤獨。
是的，激情只能短暫。維持不絕的激情，太過艱難。在電影的角度，激情，意味著死亡。因為只有死亡，才是永恆。而激情，只有經歷死亡，才能超越死亡，達致永恆。
沒有在facebook上存任何圖像，沒有在status寫下抒情字句。這夜，我正視孤寂。
原來孤寂並不可怕。害怕孤寂，比面對孤寂更加可怕。
看著頭上那遍無際的夜空，我想起那夜。我最錯的那一夜。
的確，愛情沒有錯。擁有愛情的人沒錯，追尋愛情的人沒錯。為愛情而生，為愛情而死，更加沒有錯。錯的，是追尋激情的人。活在激情之中，的確易於感動。但感動過後，仍然沒有感情。就如我曾為電影中的那個男主角而淌淚，但感動痛哭以後，我們還是沒有感情。
看著被街燈照得潔白的廣場，我知道無論它曾被無數世人所無情踐踏，但它，仍然是聖潔的。而我，看著自己雙手，感到的，卻是無比污穢。縱然我身穿厚衣，但在我眼內，我卻彷如赤裸。抱著頭，我只能失聲痛哭。
迷失在混亂之中，我被一團溫暖，所緊擁。
「我愛你。」一把我最熟識，一個曾經陪伴我三年有多，曾對我說過最無聊的笑話、最無力的打氣說話，同時也是我最期待、最渴望的聲線，在我耳邊輕喚。他用溫暖的臉頰輕輕的貼在我臉龐之上，然後，用那抖震的聲線，不斷從覆著我不能理解的那三個字。他那臉容，早被一道淚痕所無情劃破。這道淚痕，如他一道傷痕。而這傷痕，由我親手的無情地狠狠劃下。我如兇手，親手殺死一個男人。一個為我流淚的男人。
（六）
耳筒內迴響著Mr.Children的Hero。而我，仍然坐在廣場上那浪漫的長椅，看著遠方的日落。在夕陽照耀之下，廣場遍地金黃。這浪漫色溫映襯著大地上的那群白鴿。然後，白鴿亂飛，我等待著的他，如吳宇森電影中那些英雄出場的經典方式，慢慢地由斜陽的方向踱步而來。忽然間，我發現他那頭短髮，其實十分可愛。
2011年6月2日 星期四
她和他的感動
2011年5月31日 星期二
他和她的浪漫
他和她的浪漫
（一）
公園長椅上坐著一對情人，男的目光顯得呆滯而女的表情帶有憂鬱。而長椅前的那群早已移居城市的白鴿則好像有點過份安逸，如一群沒有翅膀的雀鳥。
或者是吳宇森正在導演，白鴿倏然亂飛。隨之而來的是一場雨。一場絲絲細雨。灰濛濛的天色映襯著廣場上死白的鬱悶。雨仍霏霏，那對情人靜待對方開口。
「分手吧。」男的抬高了頭，凝望著頭上那遍慘白。
女的未有回覆。廣場上只有遠方傳來的那陣雷聲的回響。
細雨打在女的臉上，水珠濕潤了她的眼眸，如那些通俗的電影分手畫面一樣，雨水存在的理由只是為了把構圖交織得更形浪漫。然後男的在雨中瀟灑地無聲告別，留下女的掩面痛哭。廣場上的這陣哀號，打破了慣常的寂靜。
我抬起頭，是一遍灰濛雲空。我想，若然可以來一場突然的雨，畫面可以浪漫一點。
「你究竟有無聽倒我講野架？」身邊的她在對我哀號。也許哀號一詞用得不好，審問更為貼切。
「嗯。」我輕聲道出。看著的，仍然是頭上那遍愁雲慘白。
「咁分手啦。」未有等待那場浪漫的分手專用雨的到來，她便直接地、坦白地，沒有任何美化地對我說出這句能夠終結一段感情的愛情專有名詞。我沒有回覆。等待著和平使者的指引。然後她憤怒地站起來，霸氣嚇得白鴿亂飛。
「死__開啦！」原本打算用一言不發，或默默無言等詞字形容她的離開，但她因白鴿亂飛而語出驚人的四個字，直接了結我把畫面浪漫化的可能。
我想，唯一和電影有著同樣浪漫的畫面，是廣場上淒美的肅寂。
（二）
也許浪漫從不建基在畫面，而是在感情之上。沒有浪漫，歸根究底，也是缺乏感情所致。也許。
我在城市漂流晃蕩，四處流浪，沒有所謂目的，也未有所要終點。我，沒有所謂。
走在城內之內，我根本無法冷靜。換個角度來說，我出奇的過於冷靜。
駐足於唱片鋪門外，我緊記著她播放過的分手情歌。情歌用華麗的措詞描繪相戀時追尋的浪漫，而浪漫的累積為了構成足夠的伏線，讓分手變得震撼感人。但為分手而寫的情歌，如沒有原因的分手，或為了分手的相戀，在我眼中，情歌的填詞人和命運一樣，一樣歹毒。
不知是否日子有功，小時候從電影電視裡看到的那些亂世情人，在傷心時流露的那些失樂悲痛的表情，在今天失戀的時候，很自然地表露出來。眼泛淚光得到的是別人同情，引用歌詞則換來旁人"讚"好。得到同情，才能換來下一段戀情。
（三）
夜已深，飯未食，現代潮人鐘情被動式。的確，主動追求的人，容易失去所謂的矜貴。只有被動，才足夠表現自身之身價。
夜已深是假的，飯未食是真的。說沒有心情吃飯是假的，不想一個人吃才是真的。分手雖然要狀作傷情，但飯，始終要食。
一個人，豆腐火腩飯吧。
忘了是誰的名言：豆腐火腩飯是男人的浪漫。為了浪漫，我吃豆腐火腩飯。用IPHONE速攝一張，FACEBOOK立即有人讚好，隨即在黃大仙東菇庭打打卡，我發現浪子的浪漫。
說到浪漫，差點忘了青島。
青島是我和她的回憶。我和她回憶不多，大多都在床上，這是現代人的浪漫。不在床上的回憶，青島是重點。
曾經喝不起Carlsberg，看不起BLUE ICE，價錢便宜而又有適合把酒的，唯獨青島。未有對酒當歌，卻會說到三角幾何。無厘頭？我倆卻快活得餐廳"收檔都唔願走"。
喝一口青島灌一口回憶，吃一個火腩我卻全身乏力。看著眼前孤獨的豆腐火腩飯，忽然間，我發現身旁獨有圍欄。在喧嘩吵鬧之間，我想起曾經共渡的種種艱難…
是三年前的今天，她的生日。當時我戶口僅餘$81.4，買不起甚麼名貴禮物。無奈之下，唯有買來數包雪條棍，和一枝白膠漿，用手工的方法，砌建了一座屬於我們的小木屋送她。記得屋頂上的那對僭建物：一對小木椅，是她的最愛。當時我說：買不起凱旋門，買得起小門屋；喝不了Carlsberg，可以喝青島；去不了綠島看滿天星空，可以坐在屋頂看香港的萬家燈火……也許她根本不喜歡這座小木屋，也許她只是為了答謝我小小心意，但沒所謂，足夠了。
又記得我倆手挽手在海傍走，沒計劃甚麼預定行程。慢步由尖東步往碼頭，又踱步回到尖東。看了甚麼風景我早已忘記了，維港這三年有分別？說了甚麼話題也忘記了，港產片這三年有分別？唯一記得是那夜晚風，那夜晚風並非特別清涼，只是海風夾雜著她最愛的Benetton的味道。那夜，我吻了她。
若「我的回憶不是我的」是毒男的悲哀，「那些回憶都是我的」則為我的好彩。昔日相處時的艱巨困苦，傷心的片段在人腦的不完全下被續漸刪除。而僅存留下的片段，是那些珍貴而又特別快樂的。
看著眼前的火腩飯，我再沒有吃下去的衝動。桌上冰涼的青島，異於那夜共醉之味道。我不想留戀，卻不能如願。忽然發現，我已失戀。
（四）
靜坐在廣場上的長椅，頭上仍是那遍愁雲的慘白。我目光呆滯，看著廣場上吳宇森的白鴿。
抬頭凝望著那一色灰濛，我祈求一場細雨。細雨也好，狂雨也好，只有風雨，才有如電影般的浪漫轉機。
（按：填詞人和命運是歹毒的。作為這個故事的作者，我比他們更加歹毒。但考慮到莫作棟和Laughing哥的下場，為了有個happy ending，我使用了Photoshop為構圖作了一點改動…首先畫了一場細雨，又調節了畫面的光亮度，畫了一對雙眼皮，又把主角"我"的身形再拉橫一點…）
如電影情節般的結尾，廣場竟然下起雨來。雨點打在我的臉頰上，感覺十分實在。眼前的那群白鴿忽然一陣擾動而亂飛，如吳宇森電影中的黑道英雄出場的模式一樣，她出現在白鴿飛舞群中。
畫面先給了我一個大頭，然後，我倆從畫面的左右方向中間行走，如電影兩小無猜的經典海報一樣。
十分老套的電影結尾，是男主角那些肉麻的愛情誓言。我也有。
「我唔需要咩男人既浪漫，都唔需要咩男人同男人既男人浪漫，我更加唔需要果D男人同火腩飯既浪漫。要既，係我同你，一個屬於我同你既浪漫！」
最後，情人在廣場長椅前深情擁吻。鏡頭往上拉，一道耶穌光劃破這個灰濛的雲間，電影的配樂也隨故事的完結而慢慢地奏出樂章裡最後一個音符，而那隻在廣場上的白鴿，向著那道神光展翅飛翔。
（五）
「你知唔知點解琴日我會同你講分手？」
「點解丫？」
「你記得三年前既琴日係我生日，但係點解你會唔記得琴日係我生日？」
「丫！係喎！哈哈，唔記得睇facebook個生日提示添..哈哈」
2011年4月21日 星期四
$15的精彩
學校戲劇節既得獎名單公佈左，
首先恭喜Hayley及小龍幫我地「零的突破」成功。
然後，拉大隊走去睇第一場既學校戲劇節既公開演出。
睇完，我O左咀。係O。幻想下我O嘴個樣。
圖： -o- (我單眼皮)
今晚既演出係屯門大會堂
學生票價$15，成人$30
有6套劇
2套小學4套中學
小學好出色，特別係當我拎自己黎比既時候。
但我真正想講既，係中學。
小學果兩套係熱身，係前菜，係十字架既中間。而中學果四套，
就係十字架上面四個唔同既方向：
若然杜大爺果套《六十平方呎》係對現實既控訴，
咁《盡頭之後》就係但丁式，有關靈魂既深入討論。
如果《仍是老地方》係對社會既唯美表現，
《逃。原夢》就係極端既悲劇式既童話。
我UP緊咩？我都唔知。我只係知道，我好興奮。
由《六十平方呎》講先。
《六十平方呎》係安柱中學既作品。講起安柱，第一時間諗起既，當然係豆釘同中英數啦。安柱既戲劇組，出色，已經唔係第一年既事喇。上年有關援交既故事，精彩，但不難忘。今年，主題設定係貪窮，其造成之衝擊，於我而言，很大，大得很。
《六十平方呎》既故事，其實好簡單，但就好寫實。故事唔多講，想講既，係故事對現實既控訴。
當然，用到控訴兩個字，又好似玩大左小小。不過，《六十平方呎》想表達既，唔係淨止活在貧窮線之下既悲衰。《六十平方呎》更加想表達既，係窮人既空間。
記得劇始，演員獨白，提到「點解係我丫？！」。好一句點解係我，答案簡單，你窮。你窮，所以你無錢補習，所以你改善唔倒自己既成績，改善唔倒自己既將來。（當然，窮人發憤成才，例子不少。但更多的，是隔代貧窮）用補習黎做例子，再好不過。特別係香港。
窮人既空間係邊？對豆釘一家黎講，係果六十平方呎。而擁有呢六十平方呎既代價係咩？就係做到成隻狗咁喇。
做，唔係問題。問題係做既回報係咩。我唔反對捱。每個年代每個地方都一定有窮人。重點係果一班窮人，有無機會脫離貧窮。香港既板間房，絕對係香港既特色地方之一。好難想像，一個咁富有既地方，竟然可以有一D，咁離譜既居住環境。更加離譜既，係政府一D野都無做。政府做既，係推地比地產商，繼續起一D，貴到仆街既「豪宅」。（不過漏水架）試諗下，黃大仙舊警察宿舍，呎價可以貴到$12000。有無搞__錯？
當然《六十平方呎》既故事，唔係單純對現實既控訴。故事靚既地方，係佢既戲劇技巧運用。相比起之後3套劇，《六》既燈光設計，最寫實到位。舞台上不斷利用燈光，呈現三位演員各處異地，卻又同時面對不同困宭既內心衝突，由觀眾席望過去，靚到無話可說。加埋演員精彩既無聲獨白，畫面充實，精彩絕倫。
不得不提既，係場境既核心只係運用左一張碌架床。舞台雖然廣闊，但由於畫面只係單單一張碌架床，結果佢制造出黎既，係一種強烈既壓逼感。而另一種壓逼感，清礎地重申故事既主題：六十平方呎。
睇到呢度，我心諗，打後果幾套，應該好難同呢套fight架喇掛~
結果，下一套，《盡頭之後》，又令我大開眼界。
講真，上年睇左果幾套入圍作品，故事上，同今年分別不大。（核心故事）當然表達上有所不同，但整體，包括其演譯方式，是頗為相似的。驟眼看，《盡頭之後》又係一個死與重生既故事，直到結局。
《盡頭之後》，係一個自殺者既故事。估都估倒，舞台劇如果講到自殺，肯定
又係一大堆「生命誠可貴」、家人朋友會好傷心等等既老道理（道理係正確架，但正確既道理唔代表人們會聽。可見每日自殺死既人都唔小），而呢個故事，正正由另一個角度，去講呢一個故事。
不約而同，上年都有一個相類似既劇，只不過結局上，上年果套著重係重生，而今年呢套，則強調係「生命得一條」呢件事上面。
我唔認同呢一種故事處理既手法，係一種悲劇既態度。相反，呢一種既表達方式，既"殺"左故事既主角，所帶黎既張力更大。無錯，劇入面既主角到最後，都係無辦法重生，感覺的確好慘。但係，又有邊個，自殺成功之後，可以重返人世？重生既故事，往往美化左自殺既旅程。雖然帶出黎既道理，我地係會比較易去接受，但偏偏，現實入面既自殺者，死，就真係死。
故事出色地欺騙了我。而他帶有的後現代味道，值得我們慢慢細味。另一個角度，這個故事，徹底地把主角殺死。也把英雄摧毀。
當然我就咁係度廢up，讀者都應該唔會有咩大感覺。但我真係唔講唔得，欲罷不能。(要知道時間已經係01:45)不過，唔講到第3同第4套中學作品，我真係會訓唔著。
《盡頭之後》下一套既，係《仍是老地方》。
幕起，一家糖水鋪，就在眼前。
是一整家糖水鋪。
我之所以，謂此劇為史詩式作品，係因為佢既時代感。特別係今日，所謂「浪漫已死」既年代。
好耐之前，曾經同朋友討論過，歷史建築既重要性。那時正夕「喜帖街」既風波，同舊區重建既紛爭。當時我先入為主既諗法，係如果可以唔拆，就唔好拆。當然，唔拆唔拆終需拆，結果一條「喜帖街」，就由一首「喜帖街」而繼續活落去。政府當時話過，會起一個喜帖城。即管睇下，果個喜帖城，會有幾多間7-11，幾多間翠華。
返返《仍是老地方》呢一個唯美式既故事。
相信好多人，都有睇過UP。UP堪稱經典。當中一段純音樂既回憶，更被視為電
影既一個靈魂：
http://www.youtube.com/watch?v=GroDErHIM_0
點解會講起UP？因為呢一套《仍是老地方》，比左我同一樣既感覺。
劇初一段，老闆呆坐一角，眼前盡是為了一睹老店風采既「忽然顧客」：在老店招牌下影一張「V^.^」照，吃一碗招牌糖水；另一邊，是視察老區的工人，手拿圖則，指手畫腳。這樣的構圖，畫面上，是完美的衝突。沒有對白，只有配樂（可惜忘掉了…），那份告別的悽美，不言而喻。
故事既核心，其實就係糖水店既故事。而我鐘意呢個故事既原因，係因為佢夠浪漫。
前面提到「浪漫已死」，點解？因為「浪漫」可以被複製。君不見鑽石係婚姻上既重要性高於愛情（你試下求婚無鑽石戒指？！），情人間既愛意同禮物既多小成正比。昨日情人互送小禮物，係心意既表達。今日情人送小禮物？無比對方__都叫好彩啦。因為我要LV，我要money。（雖然想要LV既，好多都未知LV點串）
好喇，一個咁浪漫既糖水鋪要執，故事既發展，仲唔係班老街坊喊苦喊f__k，希望保留？定拍返套歲月神偷，奇蹟保留？
No.故事帶出一個更深既含意。有D似佛語：執著是苦。且，一切隨緣。
故事簡單直接，由唯美出發。兩小無猜的愛，到結局的無奈，這劇，是大時代的悲衰。
或者因為《仍是老地方》太唯美，一下子跳到《逃。原夢》這個社會悲劇，我有點接受不來。
《逃。原夢》，乍聽之下，想起了香港話劇團的《暗戀。桃花園》。原來沒有關係。
《逃。原夢》的整體，憂傷得很。想起了《Sucker Punch》，和《a beautiful mind》。當然，硬要說的話，《inception》也能和之扯上關係。
講真，《逃。原夢》既演譯方式，頗為震撼。一開始，我真係有D接受唔倒，始終岩岩睇完半個鐘咁唯美既故事。
但唔洗幾分鐘，我都入左戲。
場刊入面提到「虛空與真實的界線」，但我就好唔鐘意由呢D永遠都無答案既問題入手，去欣賞一劇戲/劇。所以，我由我主觀既感受去睇。（KINGKONG，你幾時有客觀過？）
1)女主角面對既現實好殘酷，結果幻想出佢既美好世界，呢個係最簡單既總結。
2)女主角執倒某人日記，幫倒佢幻想出一個美好既新世界，去逃避現實，但結果現實既人摧毀女主角既幻想，逼佢面對現實，結果癲左，呢個係詳細小小既演譯。
3)女主角一早就癲左，幻想出所謂既母親同後父，再好似inception咁，係幻想入面再加多層幻想，結果出現3層幻想。呢個係inception既分析方法。
4)根本就無所謂既女主角，一切都係洋娃娃諗出黎既故事，用黎對抗寂寞既幻想。呢個係Sucker Punch既版本。
5)呢一個係你同我既故事。
所謂既逃避，係人，對一D自己唔想面對，或者無能力去面對既事，作出一種消極既反應。而幻想，以至思覺失調，起因都可能源於人既逃避。而呢種逃避，作者就用左以上既方法去演譯。
唔知大家有無聽過「毒撚」一詞？聽講呢一種人，就係逃避現實既終極體。
「毒撚」一詞，或者逃避，本身帶有負面既色彩。但我認為本質上，兩個字係中性架。試問一個人，點解要逃避，點解要去做「毒撚」？
劇入面，後父既角色係逃避既對像，而母親的視而不見，代表既係女主角無辦法可以去解決問題。結果，洋娃娃，去到本筆記，就係佢逃避既方法。
現實去講，後父代表既係慾望，母親代表既係無助，結果，網絡世界（當然，這是例子），就成為左我地逃避問題既一個好地方。
呢個故事精彩既地方，係佢超出色既舞台運用。所謂既運用，係佢能夠充份運用倒燈光，以及硬件，去形造唔同既氣氛。加埋完美既音效運用（不同於配樂），那幕雨景同絕望既痛喚，把我殺死了。
而另外，劇末用上了「富士山下」，同「little little twinkle star」（Dead Space Version？），配搭女主角雨中崩壞前既失控，美得讓我失控了。
四套劇，各走四端，這夜共冶一爐，於我是一種衝擊。
上面講過既，其實並唔係我最想分享既。我最想最想講既，我，唔識點講。
四套劇，用左好多種唔同既舞台技巧。無論燈光，無論排位，每一個地方，都落過唔小心血，而且我都好想去試。所謂既舞台，並唔係一個我地用黎比武既地方，起碼唔應該出現係學校戲劇節既公開演出入面。相反，表演應該係一種交流。透過戲劇，我地睇到既，係人生既縮影。每個故事入面既寓意，都比左我地一個反思既好機會。即使單單係去睇一個劇組，點樣努力去做好一場戲，我地，都可以有所得著。如果話柏拉圖既一生係對善既無止境追求，舞台上既呢班演員，追求既，就會係一種無實體既美。
我講左D咩我都唔知，只係好想再多謝，今日呢6隊演出既隊伍，多謝你地做左一場咁精彩既演出比我睇。多謝你地。多謝！
2011年3月20日 星期日
2011年3月9日 星期三
2011年3月2日 星期三
六千個美夢
係蘇菲個世界走緊既時候，忽然蘇菲同我講：6000。
咩6000?我諗極都唔明。係咪講緊我仲有6000年命？係架話就好喇，可以考多幾年ielts。
6000？原來係財爺派錢。
我唔係咩經濟學家，我只係一個好想黎緊既AL econ有個好成績既考生；我都唔係咩政治學家，唔需要去理會咩行為/行動先可以吸引倒人民支持。我只係一個學生。（按：都唔係！起碼無一張正式既學生証！）或者咁講啦，一個應屆AL考生。
不過亦都因為呢個身份，我體驗左好多之前無體驗過既野。嗯，等我幫呢個體驗改個名啦！就叫：窮學生大作戰。
所謂既體驗，只不過係朝早踩單車去自修室，中午係街食飯，夜晚踩單書返屋企食飯，食完又踩返去溫多陣書。日日如是。講真，我無咩所謂。而呢種咁簡樸既生活，其實我係十分享受。始終呢一種生活，比左我好多時間追求我想學既知識。（所以睇書既時間係多過溫書架XD 希望今年唔好再抄啦）
唯一同之前返學既時候唔同既，係今年我無收入。所以今年我一直用緊既錢，都係自己之前返工儲落既。（一部份用左去旅行:D）咁我應該點用，先可以捱到AL放榜？
收入方面，主要黎自新年既補給，同埋幫D小朋友補習。（需要既搵我補英文啦）
另一方面，就係盡可能減少支出喇。（又唔可以話盡晒力既…始終期間都睇左幾套劇，幾套戲，又買左幾件衫）咁點樣可以小D支出？對我黎講，就係食平D。
Ma On Shan百佳既燒味飯$9.9，壽司13:00左右會做特價，自修室對面既麵包鋪15:00有新鮮出爐既菠蘿包，M記17:00之後有特價餐（結果有次連續3日去食，食完用左$100去睇醫生）。過下過下，轉個頭就3月喇。
好喇，返返去現實。我想講既係，社會上有一D人，十年前過住呢種生活，十年後亦都好可能過住同一種生活。
我想表達既並唔係咩偉大既現論。（有朋友話我既性格，做唔倒大事/賺唔倒大錢）我想講既係，果$6000，的確，好可能會幫倒好多真正有需要既人。
我一直對「FB」呢樣野無咩好感，雖然我一直用緊。FB，我覺得好似毒品，睇住自己一直重新整理個頁面，好病態。另一方面，fb入面，亦都將人既距離拉得太近。
「我隻狗識吠丫！」
「我溫書溫左15mins喇！」
「我一粒飯食左三餐ar！」
總之就，咩都講晒出黎。
派完$6000，我都即刻打左6000!!!!!!!!出黎。(所以我覺得自己都好病態)
另外我睇倒既，就係：
「有錢旅行lu!!!」
「有錢買蘋果luu」
更加有人已經plan好晒行程，離開呢度。
講真，呢$6000大家會點用，唔關我事。只要局限條件被清楚介定，所有既行為都有效率。（呢D叫讀書讀上腦，慘過中fb毒）
我唔會like，都唔會dislike。我只會覺得大家都好幸福。
呢$6000既政策，點解我會支持佢，係因為我係百佳感受倒既「喜」。（氣氛仲好過新年。）
賣燒味既姐仔，今日sell我sell得特別落力，仲同我講左聲：「阿仔，我好開心ar!」而買緊「蘋果」既婆婆（由呢個角度，呢$6000對好多人黎講，作用都係買蘋果），都不斷咁講：可以買多個lu~
社會上面最弱勢既，並唔係果群識用FB識上街既人。最弱勢最無助既，係果一班連上街遊行既時間都無，而更要將人生大部份既精力，消耗係掙扎求存上面既人。我唔能夠講話政府派既果$6000好有效咁幫倒佢地解決即時既困宭，但係我係佢地飽經風霜既面孔上見倒既微笑，係絕對值果$6000架。
雖然，$6000幫倒既並唔會係咩長遠既社會發展（當然我又唔同意D人話會大幅既通脹），而社會既發展亦都唔應該建基係派$6000之上。但係我認為，對最有即時需要既人黎講，呢$6000，係好過要65歲先拎得既$6000好。換句話說，我認為呢$6000，係大大鼓勵左一班低收入，踏入中年，位處高壓力狀態既低技術人仕。
我唔敢講今次派錢係岩定唔岩，我亦都無資格去評論。但係作為社會既一份子，我感覺到政府係都會聽倒大眾既聲音。（無論原因為何）我衷心希望，有朝一日，香港既社會問題可以得到改善。而果班好需要社會幫助既階層，亦最終可以得到佢地應得既支持。
而對於無理既取鬧，我希望，佢地可以變得合理。
最後啦，我講下我既$6000會點用。
我會用黎考ielts，考到pass。(要考到passT___T)
pass左之後，
剩返既，我諗我應該會用黎捐。
始終，呢6000對我黎講係「利潤」（讀書讀上腦），而我既生活，亦都無需要依靠呢$6000。我希望呢$6000，會最終幫到一班真真正正有需要既人。
.jpg)
.JPG)